2026 жылғы 8-11 маусым аралығында Астана қаласында Қазақстан Республикасы Президенті Архивінің базасында IX Халықаралық жас архившілердің Жазғы мектебі өтті. Іс-шараға Қазақстан мен шетелдерден келген 100-ге жуық жас архившілер, мамандар, зерттеушілер мен оқытушылар қатысты.

Жазғы мектеп әл-Фараби атындағы Қазақ ұлттық университетінің, Ресей мемлекеттік гуманитарлық университетінің Тарихи-архив институтының, ТМД Атқарушы комитетінің, Өзбекстан Республикасы «Өзархив» агенттігінің және архив саласындағы халықаралық кәсіби ынтымақтастықты дамытуға елеулі үлес қосып жүрген өзге де серіктес ұйымдардың қатысуымен ұйымдастырылды.

Жазғы мектептің негізгі тақырыбы – архивтердің ақпараттық архитектурасын дамыту және цифрлық шешімдердің жаңа үлгілерін қалыптастыру. Бір апта бойы қатысушылар архивтердің цифрлық трансформациясы, құжаттарды басқарудың заманауи технологиялары, жасанды интеллектті енгізу және құжаттық мұраны сақтау мәселелеріне арналған дәрістерге, шеберлік сабақтарына және пікірталас алаңдарына қатысты.

Қазақстан, Ресей және Өзбекстанның жетекші мамандары, олардың ішінде Михаил Ларин, Наталия Суровцева, Анваржон Алиев, Калима Туенбаева және Бақыт Нұрпейсова дәріс оқыды. Жазғы мектеп қатысушылары Alem.ai халықаралық жасанды интеллект орталығында өткен Архившілер конгресінің жұмысына да қатысты.

Оқу бағдарламасының қорытындысы бойынша қатысушыларға халықаралық сертификаттар табысталды. Ұйымдастырушылар дәріскерлерге, серіктестерге және қатысушыларға белсенді жұмысы мен халықаралық ынтымақтастықты дамытуға қосқан үлесі үшін алғыс білдірді.

Жас архившілердің IX Халықаралық жазғы мектебі кәсіби қарым-қатынас орнатуға, тәжірибе алмасуға және архив саласының жас мамандарын даярлауға арналған беделді халықаралық алаң ретіндегі мәртебесін тағы бір мәрте дәлелдеді.

Еске сала кетейік, Жазғы мектеп 2017 жылдан бері өткізіліп келеді және архив ісі мен цифрлық технологиялар саласындағы жас мамандарды даярлауға арналған жетекші халықаралық білім беру алаңдарының біріне айналды. Осы уақыт ішінде 1000-нан астам қатысушы білім алып, біліктілігін арттырды.